Komunitas Anak Dayak Maanyan (KOMANDAN) jln. Nansarunai RT.V, dabung (depan RSUD Tamiang Layang), Kabupaten Barito Timur, contact personne : (ebbi)+6285249537058, PIN BB 27011fe5 (Alfirdaus) +621351946584 e-mail komandan_maanyan@yahoo.com komandanmaanyan@gmail.com

Senin, 28 Desember 2015

TANUHUI (cerita) SEJARAH IJAME

TANUHUI SEJARAH IJAME

Sarita hingka ulun lagi muneng hang Bawutenung, ulun hang yaru pauweng lewu re’an rumah tangga, jaman tapi’an satarat pakarangan, muneng kapatah rateh riri, ka unan wakat, katayup amun uran, kira-kira lebih kurang rueh ribu taun sahu’an masehi. Sahingga biar ka’awe rama ulun lain hang Bawutenung  uras leteng tarung, timul tarung hi amah Kuruwenu pana’anak laki wawei.
Sahingga ineh Kuruwenu nyarita hanye ang uweng kakanen. Eaw ni amun kaina ada hanyu pana’anak emah, amun aku yiti tarime apen kureng diang dara nuntun sum’mu. Yalah paribahasa manre ang iyuh ele nganrei ang ule tunup. Sasat anri jiwa wawai lamagan patah hunang hiang ganta diwata. Kude amun puang, ang iyuh sangkuriung hingka wadik iwei (ngidam). Daya inun aku ka’eau kairu, daya hampe na upi na ulis ekat kakanen ku atei memai pasiung unru, ruang ulu ruang ukui. (Ulu ipaka rueh ukui ipaka rueh).
Oooohh..... eau amah Kuruwenu, amun sa kalahie elah aku mansuba namirang ngantara. Aku puang hawi amun ang uweng pamakulis. Balalu amah Kuruwenu natap : ia itawua ni jumaka tumaspara ni tampilak, nyumput petan baning purumata hadi kajang unru nyunrap. Nyame hanye ma tamelahan gilang sisip kinret, murumihik wuri hiang ngurumunai wuri nanyu. Nyaput hanye ma ipu sariren rede upak mapak jumutaun, siput sala sika mate, siput buah magin nanan taun. Balalu nyangkilat taruh aber pu’unan jatang janra nganyak anak, hala huwe hingka lunan hai erang ka umean, hala huwe hingka lanyung hai erang ka bantayan. Raru ma wu’uwa, huan hampe haut bilut. Raru ma tawuliun, huan hampe haut witus. Pagat mata tantang pitu muat diki ruyan lanyung.

Papuyan, tempat pembakaran/ pengkremasian tulang pada Ritual adat Ijame 

Balalu hanye tulak, nuntung ma pangumatung unrunalu wulan welum. Dami hanye tulak salenga ma’eau pukang : sir mulilik kadeneng dekut, sa awe muneng hang kayu uneng hang kayu, sa awe muneng hang wakai uneng hang wakai, sa awe muneng hang bungu tane uneng hang bungu tane. Ari hi amah Kuruwenu minau namirang. Balalu hanye tulak, kia karimingkang-mingkang kala ringkang puai kalu, kia kajumawuk-mawuk kala jawuk niui ganring, masuk ma luau bumang tane jangkang padang mamu, ma janah manjati juwuk padang nenek. Pas hampe ang ngarehe naan situa-tua, jauh maka naan memai pasiung unru.
Tane karu tane, balalu hi amah Kuruwenu kia alah karu alah paile papuser palus tawang kanyu. Balalu hi amah Kuruwenu tarie maharung mamikir ma awe sa na kia. Salenga dami hanye nyanrengei naan eau tanru manu, eau buhek iwek angit – angit. Ooohh.. kunu amah Kuruwenu ware aku nuju ma yaru aku nunti himat sa wat ulun hang yaru, ma awe na kia ku yati.
Dami hanye hampe salenga kitip ranu, balalu hang penah ranu yiru naan gusung hang yeru ulun barabiuh. Balalu naan tumpung haur gading jalur meteng anrau irapis anri kakau kudiwurung kayu muntei langit. Kunu amah Kuruwenu, nantau ulun rama barabiuh hang yaru. Ware aku nyubarang ma yaru, aku nunti hingka ulun yiru inun ngaran dunia yina ma’awe na kia ku. Balalu hanye nyubarang, iru maka wauh ulun nelang kai takut. Eau amah Kuruwenu, ada naun takut aku yiti hingka Bawutenung tawang manyumirang kanyu, ngampurunan welai nunti hingka naun, ma awe aku mudi, udi hie inun ngaran dunia yina nelang inun gawi naun. Dami hanye nantau ma kayaru salenga naan sarubung, hang wuang sarubung yiru penu kudit wu’ah. Balalu eau ulun hang yiti samula tumpuk natat kami. Terdiri hingka 8 (walu) Danau :
1.      Danau Pinang Habang
2.      Danau Kalapa
3.      Danau Tabak
4.      Danau Pamaungan
5.      Danau Untip
6.      Danau Damung
7.      Danau Merek
8.      Danau Sinamak
Pusat unengan yiti ngaran ni Danau Sinamak sebagai pusat tumpuk, balalu sebagai tanda luwan iri naan na amule ha’ur gading jalur meteng anrau baya kudiwuwung kayu muntei langit, balalu na antuh gusung Sinamak. Hampe itati masih naan tumpung haur gading ni.
Nah sa pagawian yina kami naan ka angkengan bangkai matei, balalu takut tumu kayu langar wakat balalu kami kai ijame. Nah nunturungan sa hanyu balalu kami hene maaf puang kaayuh magi waktu hingka penah kasibukan yina, ngatet hanyu nutui lalan kami puang tau tutui. Ekat ni hanyu muneng hang yati nampe gawian kami yina luput. Nunturungan ma kuta pakai nu, hanyu ada mahanang atei kami nangung.
Eau amah Kuruwenu, kaawe sa lawah gawian naun?. Ha eau here, gawian kami yina salawah sapuluh anrau sapuluh malem palus naan pamadi ni. Pamadi ni puang iyuh na ini na dinung, na sanrengei ulun lain. Balalu nunturungan hanyu yiti tapaksa kami nina, malan puang kami kadinung, karengei inun na gurayang na ulah na gawi kami. Eau amah Kuruwenu, hayu aku nganrei taduh gawi naun, udi hie tarima kasih naun miwit, aku puang kajuju kala’uan. Nah neu sa nina aku, ang maka usah, elahlah aku muneng hang yina. Kude aku jujur anri naun, naun tapaksa nyalumu aku makai tabing hantai balalu aku puang sagar ka’ini ka’rengei ka’dinung inun-inun na gawi naun. Amun naun puang nyalumu makai tabing hantai, walau ka’awe lawit dina naun sika tatap ini dinung rengei rasa ku.
persiapan di papuyan sesaat sebelum pembakaran tulang dimulai

Balalu eau ulun rama hang yiru, hayu mun kahie. Sadang luput salumu here, balalu dami amah Kuruwenu ninung ranu bagalumang luar biasa. Balalu ulun ka’eau, ari matu’eh hawi. Palus kaluar wu’ah luar biasa hante ni nelang janyawai. Tampek kubesau, ka’eau hunien aku jari wu’ah itati jari murunsia. Balalu palus nanan kudit, balalu ulun pangarubut nuwe kudit wu’ah yiru ma sarubung sa dinung amah Kuruwenu. Dami matu’eh yiru haut mamai, balalu ulun nyarita kawan hunien wangun here nyalumu amah Kuruwenu. Eau matu’eh yiru puang malu sika hanye haut puang ka’ini ka’dinung ka’rengei ka’rasa gawian takam. Ekat amun gawian takam haut luput, huyu hanye mamai kakau kudiwuwung kayu muntei langit yiru dan hanye huyu naun nanruhut rawen haur yiru baya haur rawen gading jalur meteng anrau yiru, balalu hamur ma ime nelang ipinai. Wuri anyan manyane tatai gilai biring manu nanyu kamulelu kuman wasi, laku luga lalan buka sadapa rupu tumang panutean. Hamur nadap pangumatung unru nalu wulan welum. Kala yiru eau matueh yiru, balalu ulun labuh gawi.
Lengan yiru amah Kuruwenu mahapal dan inun-inun turun tingkat gawian ulun salawah sapuluh anrau sapuluh malem yiru, hanye galis kadinung nelang hapal. Dami luput balalu ulun nguka amah Kuruwenu hingka salumuan nelang baganti bagilir ngenra eau “piris kempang welai-welai, amah Kuruwenu suni marumiuk daya tawang sa ngara’erai”.
Balalu eau amah Kuruwenu, aku haut na uka, gawian naun haut luput, dan mungkin aku pada ka’i mudi. Balalu sa hu’an takam bapisah amun puang padi nelang iuh eau naun, kaawe sa amun pada ngenra lagu perpisahan takam. Eau ulun rama yiru iyuh tu’u nelang puang padi. Balalu amah Kuruwenu ngenra, eau enra ni ; “Tuntun humang-humang tuntun humang hang sangkar weta, hi amah Kuruwenu nyame ma tariuk pantantang pakai nutu pungung buhaya rama”. Balalu ulun rama ipangulik-ipangulik palus rung nempat nuju sarubung nelang kaeau ; “tampek kubesau jukang kumala, hunien jari murunsia itati jari wu’ah” balalu masuk ma kudit masing-masing ilansar mitun mawuang ranu. Wu’ah rama yiru palus nanan humur humis inun-inun parakakas Ijame.
Balalu amah Kuruwenu segera mamai kakau Kudiwuwung kayu muntei langit, irapis anri tumpung haur gading jalur meteng anrau. Balalu nanruhut rawen ni nelang ipinai. Kala patitah Pamukah Kajang nye iru ngaran Raja Wuah hawi hingka Lubuk Santubung. Wuri anyan manyana ; tatai gilang hiang biring manu nanyu kamulelu kuman wasi, laku luga lalan buka sadapa rupu tumang panuteian.
Balalu hanye namur rawen ni nadap pangamatung unru nalu wulan welum. Balalu hanye minau, dami hampe hanye ikulik tu’u luga lalan na palupui lea enui natanrukayen. Balalu hanye ngumpul humur humis parakakas perlengkapan Ijame yiru, nuwe ma wuang keba kariring anrau tawang ia tau nyarau palus ngenei tulak. Sahingga puang lawit hanye takia balalu  hampe tumpuk isa bangaran  Batang Helang Ranu. Dami hampe yiru maka tahalu ulun rama nelang nunti pamakulis.
Balalu amah Kuruwenu nyarita perjalanan ni palus iwara pamakulis ni humur humis isa kapi’isa. Dami luput sarita amah Kuruwenu, ulun pada nyarita salawah tanan ni humur humis terutama kapateian Datu Burungan. Kala yeru sejarah asal usul Ijame.

kelengkapan Hukum Adat 


Catatan : sabujur ni ijame pertama kali kai na laksana hang batang helang ranu, na jame pertama kali panamakat hi datu burungan. Kira-kira rueh ribu taun sa huan masehi na tampalus daya paju epat khusus isa beragama hindu kaharingan hampe itati. Ekat ni daya naan kakurangen isa jenis kayu sahingga puang tau na laksana. Maka ni ulun kaeau ure gawe batang helang ranu pandrau kukan tane ganggang wunrung, puang tau labuh gawi ijame daya naan kakurangen balalu ure gawe. Balalu hang jaman sani sarunai lah pelaksanaan ijame sa lengkap palus ngamuan candi wat datu burungan.  

Damang Paju Epat pada saat ngisi hukum penulisan buku Hukum Adat

Na kisah daya Pangulu adat teka Balawa awuk penulisan buku Hukum Adat Kedamangan Paju Epat taun 2015...  hang wuang ngisah sajarah yina harus ngului hukum nelang pada ngantuh ngaran guru nerau here ngihau kakatuhen kawan guru ru nien.. penulis pada haut ngului hukum balalu na sameat palus ngawit nampan hang wuang penulisan ru mahi uweng inun2 hal sa puang patut... inti ni daya inun ngului hukum yiru daya kawan narasumber ngaluar katuluh katauen karasaen here hang kegiatan yiru.. (eB)

..

Komunitas Anak Dayak Maanyan (KOMANDAN) jln. Nnsarunai RT.V dabung (depan RSUD Tamiang Layang), Kabupaten Barito Timur, contact personne : (ebbi)+6285249537058 PIN BB: 27011fe5 (Alfirdaus) +621351946584 e-mail komandan_maanyan@yahoo.com komandanmaanyan@gmail.com